ЖАЛ 1

ЖАЛ – 1) кыргыздын чүйгүн тамактарынын бири. Бир элиден ашык казысы бар семиз жыл­кыдан гана Ж. чыгат. Арык жылкынын Ж-ында майы жок чарым болот. Ж. жегиликтүү, жа­гымдуу сый тамак катары чучук, карта м-н бирге сый табактарга тартылат; 2) жылкынын ши­лисинен өркөчүнө чейинки, моюндун үстүнкү кыры м-н кыркалай созулган узундугу карыш­тан кем эмес коюу кылдар. Ж-дын маңдай жак­кы четин – «көкүл», өркөч жагын «ыйык жал» деп аташат. Тай, кунан, бышты, байталдын Ж-ы жазында кыркылат. Бирок, алардын көкү­лү кыркылбайт ж-а ыйык Ж-дан бир тутам чок калтырылат. Айыптаган, ызалаган мааниде кы­сыр калган бээлердин Ж., куйругу кыркылып, желеден бөлүнүп, субайларга кошулган.