ЖАМБАШ ЧАРАСЫ
ЖАМБАШ ЧАРАСЫ – адам скелетинин буттарды жанаша кармап, жамбаш кырчоосун түзүүчү төмөнкү бөлүгү. Ал эки жамбаш, куймулчак, чычаң сөөктөрүнөн турат. Жамбаш чарасы кичине ж-а чоң болуп айырмаланат. Жамбаш чарасы бел кырчоонун негизин түзгөндүктөн, омуртка тутумуна тирөөч. Түзүлүшүндө жыныстык өзгөчөлүктөр даана байкалат. Аялдын жамбаш чарасынын, жамбаш сөөктөрүнүн канатчалары жазы, куймулчак сөөгү жука, эркектердики узун ж-а кууш болот. Жамбаш чарасынын алдыңкы капталын чаткаяк сөөктөрү түзөт. Чоң жамбаш чарасында ич көңдөй мүчөлөрү, кичинесинде көтөн чучук, табарсык; эркекте простата ж-а урук ыйлаакчасы, аялда жатын, жатын кошумчалары ж-а жатын кыны жайгашат. Жамбаш чарасынын сөөктөрүнө арка ж-а омуртка булчуңдары бекийт. Аялдын жамбаш чарасынын түзүлүшү м-н көлөмүнүн төрөттө мааниси чоң.