ЖАПАРОВ Абдыкул
ЖАПАРОВ Абдыкул (20. 9. 1920, Чүй облусу, Москва району, Жарды-Суу айылы – 2. 3. 1999, Бишкек) – тилчи, филология илимдеринин доктору (1967). Кыргыз ССРинин эмгек сиңирген мугалими (1987). Фрунзе шаарындагы жумушчу факультетин бүтүргөн (1937). Улуу Ата Мекендик согушка катышкан (1940– 44). Москва районундагы Будённый орто мектебинде директор, ошол эле райондун Орто-Суу орто мектебинде окуу бөлүмүнүн башчысы (1944– 47). Кыргыз мамлекеттик педагогикалык институтун бүтүргөн соң (1947), Кыргыз ССР агартуу министрлигинде инспектор (1947–49), КМУда окутуучу, профессор (1951– 99). Илимий эмгектеринде сөз айкашынын синтаксиси, сүйлөм мүчөлөрүнүн теориясы, жөнөкөй ж-а татаал сүйлөмдүн синтаксиси боюнча маселелери иликтөөгө алынган. Ал 1-даражадагы Ата Мекендик согуш ордени м-н сыйланган.
Эмг.: Кыргыз тилинин грамматикасы. 2-бөлүк. Синтаксис: 6–7-класстар үчүн. Ф., 1950, 1959; Азыркы кыргыз тили. Ф., 1966; Кыргыз тилинин синтаксиси. Ф., 1979.