ЖАШТАРДЫН ЭЛ АРАЛЫК ОЮНДАРЫ
ЖАШТАРДЫН ЭЛ АРАЛЫК ОЮНДАРЫ – спорттун 15 түрү боюнча жашы 18ге чейинки жаштар катышкан эл аралык мелдештер. Эл аралык Олимпия комитетинин көзөмөлү астында Москва шаарында 1998-жылы 20-июлда өткөрүлгөн. 131 өлкөнүн спортчулары катышкан. Олимпия оюндарынын салты боюнча жаштардын эл аралык оюндарында Олимпия кыштагы курулуп, Грекияда күйгүзүлгөн Олимпия оту эстафета аркылуу жеткирилип ж-а Олимпия желеги көтөрүлөт. Жаштардын эл аралык оюндарына катышкандардан 64 өлкөнүн спортчулары байгеге жетишкен. Командалык эсепте биринчи орунга Россия (64 алтын, 29 күмүш, 31 коло), экинчиге Украина (10, 19, 23), үчүнчүгө Кытай (21, 7, 9) татыган. Жаштардын эл аралык оюндарында негизги программадан тышкары спорттун 30 түрү боюнча көрсөтүү иретинде мелдеш ж-а «Жаштар – Илим – Олимпизм» деген илимий форум (150 окумуштуунун катышуусу м-н) болуп өткөн. Жаштардын эл аралык оюндарында анын жеңүүчүлөрүнүн ж-а байгеге ээ болгондордун ичинен Олимпия оюндарынын азыркы чемпиондору ж-а байгеге ээлери өсүп чыккан. Кыргызстандан бул оюндарга К. Бегалиев (грек-рим күрөшү), Д. Көбөнов (грек-рим күрөшү; 3-орун) ж. б. катышкан.
А. Нишанов.