ЖЕР АСТЫНДАГЫ ТЕМИР ЖОЛ
ЖЕР АСТЫНДАГЫ ТЕМИР ЖОЛ , м е т р о п о л и т е н – жердин асты м-н жүргүнчү ташуучу темир жол системасы. Ачык ыкма м-н курулган биринчи жер астындагы темир жол 1863-жылы Лондондо ачылып, жүргүнчүлөрдү Пэддингтондон Фэррингтонго ташыган. Бул линияда көмүр м-н иштеген буу локомотивдери жүргөн. Бир топ тереңдикте курулган алгачкы жер астындагы темир жол 1890-жылы Англияда Сити м-н түштүк Лондонду туташтырган. Бул линия м-н электр локомотиви жүргөн. Жер астындагы темир жол Будапештте 1896-жылы, ал эми Бостондо (АКШ) 1895–97-жылдарда ачылган. 1898-жылы Париж метросун куруу башталган. Мындай транспорттук система тез эле дүйнөнүн көптөгөн ири шаарларында курула баштады. 1932-жылы курула баштаган Москва метрополитени эң ири жер астындагы темир жол болуп эсептелет. Ал азыркы учурда күнүнө 6,5 млндон ашык жүргүнчү ташыйт. Айрым линияларда поездди башкаруу автоматтык түрдө ишке ашырылат. Париж метросунда ж-а анын долбоору м-н салынган башка шаарлардагы жер астындагы темир жолдо поезд рельс м-н эмес, бетон аркылуу жүрөт.