ЗАМБЕЗИ
ЗАМБЕ́ЗИ – Түш. Африкадагы дарыя. Замбия, Ангола ж-а Мозамбик өлкөлөрүнүн аймагы аркылуу агып өтөт. Уз. 2660 км, алабынын аянты 1330 миң км2. Заирдин чек арасына жакын жерде, Лунда платосунан башталып, Инди океанынын Мозамбик кысыгына куярда дельтаны пайда кылат. Башатынан Виктория шаркыратмасына чейин (1200 км) түздүк аркылуу, андан ары Мозамбик ойдуңу м-н агат. Босоголуу бөлүгү (Катима, Кебрабаса) 100 кмге созулат, шаркыратмалары (Гонье, Виктория ж. б.) бар. Эң ири куймалары – Кафуэ ж-а Луангва, Шире. Ньяса (Малави) көлү З-нин алабына карайт. Декабрдан апрелге чейин кирет. Орт. чыгымы чатында 16 миң м3/сек, жылдык агымы 106 км3. Балык кармалат. Ири ГЭС ж-а Кариба суу сактагычы курулган. Босоголордун көптүгү кеме жүрүүгө кыйынчылык келтирет; негизинен Замбиянын аймагында гана кеме жүрөт.