ЗЕРГЕР 1

ЗЕРГЕР (фарсча зэргэр – алтын буюмдар уста­сы) – асыл (алтын, күмүш, платина ж. б.) ж-а түстүү металлдардан көркөм буюмдарды жасоо­чу чебер уста. Алар өз алдынча устаканада уза­нышып, бирден-экиден шакирт (окуучу) кар­машкан. Асем буюмдарын (билерик, искек, жел­бирөөч, оймок, шакек, топчу, төөнөгүч, сөйкө, чолпу ж. б.) жасашкан. О. эле ат жабдыкта­рын (ээр, жүгөн, куюшкан, көмөлдүрүк, бас­майыл, камчы, үзөнгү ж. б.), жоо-жарактарын (айбалта, саадак, калкан ж. б.), үй эмеректерин (ала бакан, жагдан, үкөк ж. б), муз. аспаптарды (ооз комуз, сыбызгы, чоор ж. б.), аңчылык (то­мого, балдак) ж-а жыгач, мүйүз, көн (шири) буюмдарын шөкөттөгөн. Кыргызда «Эр кады­рын эл билет, зер кадырын зергер билет» деген макал ошондон улам айтылса керек.