ИБРАЕВ 1
ИБРАЕВ Анарбек (4. 4. 1951-ж. т.‚ Ысык-Көл обл.‚ Ак-Суу р-ну‚ Тепке айылы) – ырчы, КРдин эл арт. (1999). Кыргыз мамл. филармониясынын алдындагы эки жылдык студияны (1969)‚ Б. Бейшеналиева атн. КМИИни (1979) бүтүргөн. Чыг-лыгы 1969-жылдан башталган. Адегенде Ч. Кожомжаров
жетектеген туңгуч кыргыз эстрада ансамблинде‚ 1981-жылдан К. Орозов атн. Кыргыз эл аспаптар оркестринде‚ бир эле мезгилде А. Малдыбаев атн. Кыргыз мамл. опера ж-а балет театрында (1992-жылдан) солист. М. Рыскулбеков («Эжелерим‚ агайым»)‚ C. Жумалиев («Таң сыры»‚ «Үзүлбөгөн үмүттөр»‚ «Cары-Челек»)‚ Ж. Шералиев («Кыргыз жайлоосу»‚ «Эстей берем»)‚
А. Керимбаев («Көл баяны»)‚ C. Бактыгулов («Ырымды сага арнаймын»)‚ Ш. Дүйшөналиев («Кумаркөз») ж. б. обончулардын ырларын чебер аткарат. Операда ырдаган партиялары: Сыргак, Күлчоро, (А. Малдыбаев, В. Власов, В. Фере, «Манас», «Айчүрөк»), Болот (Ж. Каниметов, «Ак Мөөр»), Ленский (П. Чайковский, «Евгений Онегин»), Альмавива (Ж. Россини, «Севильялык чач тарач»), канзаада Тамино (А. Моцарт, «Сыйкырдуу чоор») ж. б. Италия‚ Франция‚ Тунис‚ Румыния‚ Түркия ж. б. өлкөлөрдө гастролдо болгон.