ИДИШ ЖУУГУЧ
ИДИШ ЖУУГУЧ – тамак-аш ө. ж-нда, үй-тиричилигинде (ашканада) колдонулуп, идиштерди автоматтык түрдө жууй турган машина. Тор же корзинадан турган жөнөкөй И. ж. 1920- жылдын аягында пайда болгон. Ага кир идиштер толтурулуп, андан соң ысык суунун катуу агымы чыккан раковинага чөмүлдүрүлгөн. Азыркы электрдик И. ж-тун бет маңдайында идиш салуу үчүн суу өтпөгөн эшиги ж-а идиш үчүн пластик капталган тор зымы болот. Электр насосу май тактарын эритүү үчүн май кетиргич каражаты бар ысык суу агымын багыттап, андан соң идишти чайкап, кургатат. Бул операциялар электр-мех. түзүлүштүн жардамы м-н автоматтык түрдө ишке ашырылат. И. ж. универсал, атайын, үзгүлтүксүз ж-а мезгилдүү болуп бөлүнөт да, идишти суунун агымы ж-а щётка м-н жууйт. Констр-сы камера ж-а ачык түрдө жасалат. Камера тибиндеги машина идиштерди суунун агымы аркылуу же 30–60°С атайын эритме м-н, ал эми ачык типтегиси щётканы колдонуп, суу же эритме м-н жууйт.