ИХТИОЛОГИЯ
ИХТИОЛО́ГИЯ (гр. ishthys – балык ж-а ...логия) – зоологиянын балыктардын түзүлүшүн, өнүгүүсүн, таралышын, тиричилигин, систематикасын, эволюциясын изилдөөчү бөлүгү. Балыктардын түзүлүшүн ж-а органдарынын функциясын изилдөө биониканын, негизинен биогидроакустиканын өрчүшүндө чоң мааниге ээ болду. И. б-ча алгачкы изилдөөлөрдү Индия окумуштуулары жүргүзгөн (б. з. ч. 6-к.). Балык өстүрүү, алардын тиричилиги ж-дөгү туңгуч китеп б. з. ч. 1-миң жылдыкта Кытайда жарык көргөн. Б. з. ч. 4-к-да Аристотель «Жаныбарлар тарыхы» деген китебинде балыктарды сууда жашоочу омурткалуулардын өзүнчө тобу деп бөлгөн. И. Европада 15-к-дан баштап өнүгө баштаган. 20-к-дын ортосунан баштап ихтиологдор балыктардын жашын, өсүшүн, азыктануусун, көбөйүшүн, таралышын ж-а миграциясын изилдөөнүн жаңы методдорун иштеп чыгышкан. И-нын негизги милдети – тамак-аш ресурстарын океан, деңиз сууларынан көбүрөөк алуу, промыселдик балык өстүрүүнү өнүктүрүү, алардын кунардуулугун рационалдуу пайдалануу ж. б. Кырг-нда И-нын өсүшүнө Ф. А. Турдаковдун салымы чоң. И-лык изилдөөлөр КР УИАнын Биология ж-а биотехнология ин-тунун лаборсында жүргүзүлөт.
Ад.: Турдаков Ф. А. Рыбы Киргизии. Ф., 1963;
Юдкин И. Ихтиология. М.,1970.