КАЗЫНАЧЫЛЫК
КАЗЫНАЧЫЛЫК (казначейство; англ. exche- duer) – финансы министрлигинин курамындагы же ага караштуу атайын мамл. орган. АКШда К. финансы министрлигинин департаменти‚ Францияда финансы министрлигинин К. башкармалыгы катары иштейт‚ Улуу Британияда финансы министрлигинин курамына кирет. Россияда 1863-жылдан уюшулган‚ кийин финансы министрлигинин курамында департамент болуп түзүлгөн. CCCРде мамлекеттик бюджеттин кассалык милдетин CCCР Мамбанкы аткарган. Кырг-нда КР Финансы министрлигинин К-ы Кыргыз Өкмөтүнүн 1994-жылдын 2-февралындагы «Кыргыз Республикасынын Финансы министрлигинде казыначылыкты түзүү жөнүндө» ж-а 1994-жылдын 24-мартындагы «Кыргыз Республикасынын Финансы министрлигинде Борбордук казначылыкты жана анын региондук бөлүмдөрүн түзүү жөнүндө» токтомдоруна ылайык түзүлгөн. К-тын негизги милдеттерине мамл. бюджеттин долбоорун түзүү ж-а анын аткарылышын башкаруу‚ мамлекеттик карызды‚ мамлекеттик баалуу кагаздардын эмиссиясын башкаруу кирет. К. салыктын‚ бажы алымынын ж. б. бюджетке түшүшүн көзөмөлдөйт ж-а бекитилген ассигнованиелерге ылайык бюджеттик каражаттарды берет.