КАИМОВ
КАИМОВ Касым (6. 3. 1926, Талас р-ну, Арал айылы – 13. 7. 1989, Бишкек) – жазуучу, Кыргыз ССР мад-тына эмг. сиң. ишмер (1976). Фрунзедеги мугалимдер ин-тун (1945), КМУнун фи-
лология ф-тин (1955) бүтүргөн. Таласта райондук гезиттин жооптуу секретары (1942–43), обл. «Лениндик туу» гезитинде түрдүү кызматтарда (1949–52), «Жаш ленинчи» журналында бөлүм башчы, «Кыргызстан пионери» гезитинин жооптуу секретары, редактору (1953–56), «Чалкан» (1956– 59), «Ала-Тоо» (1959–63) журналдарында редактор, «Кыргызфильм» студиясынын сценарий б-ча редколлегиясынын (1963–68), «Кыргызстан маданияты» гезитинин (1968–73) башкы редактору, 1973-жылдан Кырг-н жазуучулар союзунун секретары болуп иштеген. Чыг-лыгын 1942-ж. ыр, фельетон, очерк жазуудан баштаган. 1955-ж. жарыкка чыккан «Соңку жолугушуу» деген алгачкы китеби жазуучуну чыг-лык максатын эркин туюнта алган калемгер катары тааныткан. К. – «Адашуу» (1957), «Мектеп жолунда» (1958), «Талаа жылдызы» (1964), «Бири бирине окшобогон күндөр» (1968), «Кыш ыргактары» (1973), «Белгилүү эркек» (1975), «Ийри жылан» (1978) повесть, аңгеме, драмалар жыйнактарынын автору. Атай Огомбаевдин өмүр жолун көркөм сүрөттөгөн идеялык-эстетикалык табылгаларга бай «Атай» (1961, 1969, 1979), «Акырын күтпө» (1984) романдары, «Тандалган чыгармалары» (1976, 1984) жарык көргөн. К. назик юмор, тымызын какшык, жайдары күлкү жарата билген аңгемечи, сюжет курууга уста, жандуу образ түзүүгө чебер, көп кырдуу жазуучу болгон. Орус тилинде К-дун «Ночь на перевале» (1958), «Атай» (1968), «Маршруты дружбы» (1970), «Степная звезда» (1972), «Жажда» (1985) жыйнактары чыккан. «Ардак Белгиси» ордени ж-а медалдар м-н сыйланган.