КАЙЧЫ ГҮЛДҮҮЛӨР
КАЙЧЫ ГҮЛДҮҮЛӨР , к а п у с т а л а р (Brassicaceae, Cruciferae) – өсүмдүктөрдүн жабык уруктуулар тукуму. Көбүнчө чөп, кээде бадал же чала бадал. Жалбырагы кезектешип жайгашкан. Топ гүлү көбүнчө чачыдай, эки жыныстуу, 4 мүчөлүү, алар бири бирине кайчы жайгашкандыктан, К. г. деп аталат. Мөмөсү – саадак же саадакча. Айрым түрүнүн мөмөсү – бир уруктуу, ачылбай турган жаңгакча. К. г. тукумунун 500дөн ашык урууга кирген 3000дей түрү бар. КМШ өлкөлөрүндө 130 уруусунун 800 түрү, Кырг-нда 68 уруусунун 200 түрү өсөт. К. г-дүн көпчүлүгүндө кескин жыттуу эфир майлары болот. Алардын пайдалуу түрү көп. К. г. жашылча (капуста, брюква, чамгыр, шалгам), май алуу үчүн (ындоо, кычы), тамакка жакшы кош даам, жыт берүү үчүн (хрен, кызыл гүл, катыраң, горчица), дары (койчу баштык), о. эле тоют, боёк алуу үчүн ж-а гүлзарларда кооз өсүмдүк катары өстүрүлөт.