КОРОГЛЫ

КОРОГЛЫ Халык (1919, Ашхабад) – адабият­чы, фольклорчу, филология илимдеринин доктору (1971), профессор (1986). Москва мединститутун (1946), М. В. Ломоносов атындагы ММУнун филология факультетинин Чыгыш бөлүмүн (1952) бүтүргөн. Түрк ж-а иран тилдеринде сүйлөгөн элдердин баатыр­дык эпосторун салыштырма изилдөөдө зор эм­гек сиңирген. 1947-жылы иран тили ж-а адабияты боюнча ЖОЖдордо, 1954-жылы ММУнун филология факультетинде Орто Азия, Казакстан элдеринин адабиятта­ры боюнча лекция окуган. 1958–71-жылдарда «Большая Советская Энциклопедия» басмасынын тил ж-а адабият редакциясынын илимий редактору, «Крат­кая литературная энциклопедия» редакция­сынын башчысы, 1971–85-жылдарда СССР ИАнын А. М. Горький атындагы Дүйнөлүк адабият институтунун улук илимий кызматкери болуп иштеген. Короглы кыргыз фольклору, анын ичинде «Манас» эпосун изилдеген.

Эмг.: Огузский героический эпос. М., 1976; Взаимо­связи эпоса народов Средней Азии, Ирана и Азербай­джана. М., 1983.