БАШ-КАРА-СУУ КУМ-ШАГЫЛ КЕНИ

БАШ-КАРА-СУУ КУМ-ШАГЫЛ КЕНИ Чүй облусунун Аламүдүн районунда, Бишкек шаарынан 16 км түштүктө, деӊиз деӊгээлинен 1068–1147 м бийиктикте. 1984–85-ж. чалгындалган. Пайдалуу кен катмары ортонку төртүнчүлүк мезгилинде пайда болгон кой таш-кум-шагыл кошундуларынан түзүлгөн. Калыӊдыгы 1,8 мден 33,5 мге чейин өзгөрүп, орточосу 11 мди түзөт. Кой таш-кум-шагыл негизинен интрузия тектеринин сыныктарынан, кесек бүртүктүү кумдан турат. Кенден кум-шагыл алууга болот. Запасы В–498 миӊ м³, С₁–2987 миӊ м³, В+С₁–3485 миӊ м³, С₂–575 миӊ м³.