БЕКИТҮҮЧҮ ПАТРОН
БЕКИТҮҮЧҮ ПАТРО́Н м а ш и н а к у р у у д а – металл кесүүчү станокто иштетилүүчү тетикти же аспапты бекитип, кармап туруучу түзүлмө. Анын негизги бөлүктөрү – тулкусу ж-а тетик кармагычы. Тулкусу станокко бекитилип, иштетүү убагында тетик же аспап Бекитүүчү патрон м-н кошо айланат. Станоктун түрүнө жараша Бекитүүчү патрон токардык, чарыктык, бургулоочу ж. б. болуп айырмаланат. Токардык Бекитүүчү патрондун ичинен жетелөөчү (поводоктуу), эки, үч, төрт муштумчалуу (тетикти борборлоштуруп бекитүүчү), төрт цангалуу патрондор белгилүү. Эки-үч муштумчалуу патрондор спираль алкактуу, калтектүү (рычагдуу) болуп жасалат. Төрт муштумчалуу патрондун ар бир муштумчасы өз алдынча жыла алат. Бекитүүчү патронго тетиктер кол м-н, пневматикалык же автоматтык түрдө бекитилет. Өтө чоң Бекитүүчү патрон электр кыймылдаткычы м-н жабдылган.