БӨЛҮШТҮРГҮЧ БӨРК

БӨЛҮШТҮРГҮЧ БӨРК – станокто иштетилүүчү тетикти мезгил-мезгили менен айлана боюнча буруп туруучу жасалга. Көбүнчө фрезалык станокто пайдаланылат. Анын механикалык (жөнөкөй, универсал) жана оптикалык түрлөрү бар. Универсал Бөлүштүргүч бөрк көп таралган. Оптикалык Бөлүштүргүч бөрк өтө так иштетүү үчүн, ал эми универсал Бөлүштүргүч бөрк механикалык иштетүү өндүрүшүндө бөлүү же бурама кобул жасоо үчүн колдонулат. Бөлүүнүн жөнөкөй жана дифференциалдык ыкмалары бар. Анын жардамы менен өндүрүштө ар кандай тетиктердин [тиштүү дөӊгөлөк, жылгатиштүү (шлицтүү) вал, бургу, фреза ж. б.] түз, бурама оюктары жасалат. Тетикти айландыруучу Бөлүштүргүч бөрктүн ийиги (шпиндели) туткасынан кол менен буралат.