ГААГА
ГАА́ГА (Den Нааg) – Нидерланддагы шаар. Түштүк Голландия провинциясынын административдик борбору. Калкы 515,0 миӊ (2016, шаар айланасы менен 670 миӊдей). Түндүк деӊиздеги порт (Схевенингендин аванпорту). Чоӊдугу боюнча өлкөдөгү 3-шаар. Электр-техника, радиоэлектроника, авиа куруу, тамак-аш, жеӊил өнөр жайы иштейт. Айнек жана жыгачтан көркөм буюмдар даярдалат.
Өкмөттүн жана король сарайынын резиденциясы, Бириккен Улуттар Уюмунун эл аралык соту жайгашкан. Консерватория (1908), музейлер бар. XI кылымдын аягынан эскерилет (XIX кылымдын башынан шаар). Бинненхоф архитектуралык ансамбли, готика стилинде курулган Синт-Якобскерк чиркөөсү (XIV кылым), эски ратуша (1564–1565), Маурицхёйс (1633–1635) ак сарайында королдордун сүрөт кабинетине таандык «алтын кылымдын» көркөм чыгармалар коллекциясы сакталган.