ГВАДАЛАХАРА
ГВАДАЛАХА́РА , Г у а д а л а х а р а – Мексиканын батышындагы шаар. Мексика тайпак тоосунун түштүк-батышында, 1567 м бийиктикте жайгашкан. Халиско штатынын административдик борбору. Калкы 1,4 млн (2015); калкынын саны боюнча Мехикодон кийинки 2-шаар. Тогуз жолдун тоому. Метрополитен бар. Саламанкадан нефть ж-а нефть продукциясы, Сьюдад-Пемекстен газ куурлары келет. Өлкөнүн соода-өнөр жай, илимий, маданий борбору. Эл аралык аэропорту бар. Машина куруу (радиоэлектроника өнүккөн), металл иштетүү, тамак-аш–татымал, булгаары-бут кийим, текстиль, химия өнөр жай ишканалары ж-а «Honda» компаниясынын автозаводу (жылына 27 миӊ даана) иштейт. Университеттер, калк китепканалары,
заманбап искусство галереялары, музей, Х. К. Оросконун музей-өнөрканасы, планетарий, зоопарк бар. 1531-жылы негизделген. Чиркөөлөр, 16–18-кылымдардын коомдук курулмалары (анын ичинен Сан-Франсиско, 16–17-кылымдар; Санта-Моника чиркөөлөрү, 1720–33) сакталган. Епископ Каваньястын госпиталынын имараты Бүткүл дүйнөлүк мурастын тизмесине кирген. Шаарга жакын ГЭС бар.