ГРИГОРЬЕВ МӨӉГҮСҮ

ГРИГО́РЬЕВ МӨӉГҮСҮ – Ички Теӊир-Тоодогу жалпак чоку тибиндеги мөӊгү. Узундугу 6 км, аянты 8,3 км². Тескей Ала-Тоонун түштүк капталында, Ара-Бел суусунун алабында жайгашкан. Мөӊгүнүн башы деӊиз деӊгээлинен 4606 м, этеги 4202 м бийиктикте жатат. Кар чегинин бийиктиги 4400 м. Мөӊгүнүн формасы үч бурчтук сымал, эӊкейиштеген сайын жайылып, этегинин эни 4 кмге чейин жетет. Калыӊдыгы 100–150 м. Сырткы көрүнүшү түндүктөгү аралдардагы калкан сымал мөӊгүлөргө окшош. Мөӊгү академик А. А. Григорьевдин ысмынан аталган.