ГУТА АЙНЕГИ
ГУ́ТА АЙНЕГИ (нем. hutte – айнек үйлөөчү устакана) – формасыз, эркин үйлөө жолу менен алынган көркөм айнектин бир түрү жана андан жасалган буюмдар. Биздин заманга чейинки I кылымда ойлонуп табылган айнек үйлөөчү түтүк жөнөкөй (үй идиштери) жана
татаал формада, капталдары жука, кээде чоӊ көлөмдөгү (эллиндик жана байыркы рим айнеги) идиштерди жасоого мүмкүнчүлүк берген. Гута буюмдары айнекке кошуп эритилген чапталуучу пластикалык деталдар менен жасалгаланган. Эркин үйлөө ыкмалары устаны эӊ кылдат (виртуоздук) чеберчиликке үйрөткөн. Кайра жаралуу доорундагы венециялык айнек үйлөгүчтөрдүн чыгармалары өзгөчө айырмаланат. Жогорку сапаттагы Гута айнеги Россияда XVIII–XIX кылымдарда көпөстөрдүн чакан заводунда чыгарылган. Кыргызстанда Токмок шаарындагы айнек заводунда айнектин жана айнек буюмдарынын түрлөрү жасалат.
