ДАН ТАЗАЛАГЫЧ
ДАН ТАЗАЛАГЫЧ – өсүмдүктөрдүн данын тазалоочу ж-а сорттоочу айыл чарба шайманы. Ал данды төмөнкү белгилери боюнча сорттойт: дан м-н анын кошундуларынын аэродинамикалык касиеттери; өлчөмү, калыӊдыгы, узуну ж-а эни; дан бетинин бүдүрү, формасы, тыгыздыгы, өӊү ж. б. Ал аба бөлүкчөсүнөн, калбырлуу стандан ж-а триерден туруп, жалпак ж-а цилиндрлүү, термелүүчү ж-а айлануучу болуп бөлүнөт. Дан тазалагычтын көчмө (ОС-4,5А, ОВП-20) ж-а орнотмо (ОВС-10Б, СВУ-5) түрлөрү бар. Көчмөсү кырманда, орнотмосу дан тазалоочу ж-а сорттоочу жайларда колдонулат. ОС-4,5 А нын өндүрүмдүүлүгү 4,5– т/6 саат, ОВП-20 ныкы 10–20 т/саат. Жашылча ж-а техникалык өсүмдүктөрдүн үрөндөрү өндүрүмдүүлүгү 0,1–0,9 т/саат болгон универсалдуу СУ-0,1 дан тазалагычында тазаланат.