ДАНИЯ ТИЛИ
ДА́НИЯ ТИЛИ , д а н т и л и – Даниянын расмий тили. 16–19-кылымдарда Дания тили Норвегиянын да расмий тили болгон. Ал герман тобундагы тилдердин скандинавия (түндүк герман) топчосуна кирет. Дания тилинин тарыхы үч мезгилди камтыйт: жалпы скандинавиялык түпкү тил (3–9-кылым), байыркы Дания тили (9–16-кылымдар), жаӊы Дания тили (16–20-кылымдар). Жаӊы Дания тилине азыркы (20–21-кылымдар) Дания тили кошулуп кетет. Дания тили ютланддык (түндүк-чыгыш, түштүк-батыш), аралык (зеландиялык, фюндук ж. б.), чыгыш даниялык (борнхольмдук, скондук ж. б.) деп үч топко бөлүнөт. Адабий тили зеландия диалектисинде калыптанган. Грамматикалык ж-а сөздүк курамы боюнча түндүк норвег тилине жакын. Дания тилинин жазуусу латын графикасы боюнча түзүлгөн.