ДЕЗИНСЕКЦИЯ
ДЕЗИНСЕ́КЦИЯ (дез… ж-а лат. insectum – курткумурска) – оору козгогуч чымын-чиркейлерди, азык-түлүк ж-а өсүмдүктөргө зыян келтирүүчү курт-кумурскаларды жок кылуу. Дезинсекция турмуш-тиричиликте чымын, таракан, кантала, бүргө, биттерди жок кылуу, ошондой эле чиркей, кене ж. б. сактануу үчүн жүргүзүлөт. Дезинсекциялык чаралар алдын алуучу ж-а кырып жок кылуучу болуп бөлүнөт. Алдын алууда турак жайды таза кармап, тамак-ашты чымын, таракан, кумурскалар кире албаган идиште сактоо ж. б. кирет. Курт-кумурскалар, алардын жумурткалары физикалык, химиялык ж-а биологиялык жол м-н жок кылынат. Физикалык жолдорго кийим, төшөнчү, килем ж. б. буюмдарды күбүп, кагуу, чаӊ соргуч м-н сордуруу, чымын, таракан кармагычтарды, лампа, кайнак суу ж. б. пайдалануу кирет. Химиялык жол м-н жок кылууда химиялык каражаттар – гексахлоран, ДДТ, хлорофос ж. б., биологиялык Дезинсекцияда микроорганизмдер, канаттуулар пайдаланылат.