ДЕЗИНФЕКЦИЯ
ДЕЗИНФЕ́КЦИЯ (дез... ж-а лат. infectio – жугузуу) – жугуштуу оорулардын козгогучтарын (бактерия, вирус ж. б.) жок кылуу. Дезинфекциянын негизги максаты – суу, тамак-аш, буюмдарды жугушсуздандыруу м-н инфекциянын жугуусун токтотуу. Мында механикалык, физикалык ж-а химиялык ыкмалар пайдаланылат. Механикалык ыкмада турак жайды актап, сырдоо, тазалоо, кийим, төшөнчүлөрдү күбүп-кагуу ж. б. кирет. Физикалык жолдо кургатуу, күн нуру, ультракызгылт көк нур таасир этүү, таштандыларды өрттөө, буюмдарды кайнатуу ж. б. колдонулат. Химиялык ыкмада кислоталар, щелочтор, хлор акиташы, хлорамин, фенол, формалин ж. б. түрдүү концентраттардагы эритмелери пайдаланылат. Дезинфекция в е т е р и н а р и я д а короо-сарай, мал союлуучу жайды, мал ташуучу транспорт ж. б. инфекциядан сактоо максатында жүргүзүлөт.