ДИЗЕЛЬ ЭЛЕКТР СТАНЦИЯСЫ
ДИ́ЗЕЛЬ ЭЛЕ́КТР СТАНЦИЯСЫ – дизель кыймылдаткычтары аркылуу айландырылуучу бир же бир нече генератор м-н жабдылган энергетикалык курулма. Дизель электр станциясы туруктуу ж-а көчмө болуп бөлүнөт. Туруктуу Дизель электр станциясына кубаттуулугу 110–2200 кВт ж-а андан көп болгон төрт тактылуу (кээде эки тактылуу) дизель кыймылдаткычтары орнотулуп, негизинен синхрондук генераторлор м-н жабдылат. Мындай станциялар электр тармактарынан алыс суу ж-а жылуулук станцияларын курууга мүмкүндүк жок жерлерде пайдаланылат. Көчмө Дизель электр станциясы айыл чарба, токой, өнөр жай ж-а геологиялык чалгындоо экспедициясында негизги (же авариялык) ток булагы, ал эми транспортто негизги энергетикалык курулма катары колдонулат. Дизель электр станциясынын артыкчылыгы – үнөмдүү, туруктуу иштейт, бат ж-а жеңил от алат; кемчилиги–капиталдык ремонтко чейинки иштөө мөөнөтү аз.