ДЮМА
ДЮМА́ Александр (24. 7. 1802, Франция, Вилер-Котре – 5. 12. 1870, Пюи) – француз жазуучусу. Чыгармачылыгын 1825-жылы драматургия жанрында баштаган. Адабий айдыңга француз романтикалык драмасынын алгачкы туундуларынын бири «Генрих III жана анын сарайы» аттуу пьесасы (1829) аркылуу кеңири таанылган. «Антони» (1831),
«Нель мунарасы» (1832) ж. б. пьесалары белгилүү. 1835-жылы «Бавариялык Изабелла» деп аталган алгачкы романы жарык көргөн. 19- кылымдын 40-жылдары «Үч мушкетёр» (1844), «Жыйырма жыл өткөн соң» (1845), «Виконт де Бражелон» (1848–50) романдары Париж гезиттеринде жарыяланган. Генрих Наваррский жөнүндө үчилтик («Королева Марго», 1845; «Монсоро ханым», 1846; «Кырк беш», 1847–48), «Граф Монте-Кристо» (1845–46) романын, ошондой эле эскерүү, очерктерди да жазган. Бир катар чыгармалары кыргыз тилине которулган.