ЕВРОПА БИРИМДИГИ
ЕВРО́ПА БИРИМДИГИ (ЕБ) – батыш европалык 12 мамлекеттин бирикмеси, эл аралык үч уюмдан: Европа экономика биримдиги (ЕЭБ), (ЕЭК)‚ Европа атом энергиясы боюнча биримдиги (Евратом)‚ Европа көмүр ж-а болот биримдигинен (ЕКББ) пайда болгон. 1967-жылдан жалпы жетекчи органдары ж-а жалпы бюджети болгон. 60-жылдардын аягында бажы союзу түзүлгөн: 1) бажы салыгы ж-а өз ара соодада сандык чектөө алып салынган; 2) үчүнчү өлкөлөргө карата бирдиктүү бажы тарифи киргизилген; 3) бирдиктүү тышкы соода саясаты ишке ашырылган; 4) Европа валюта системасы иштеген; 5) артта калган ж-а өндүрүшү иштебеген райондорду өнүктүрүү боюнча биргелешкен региондук саясат жүргүзүлгөн; 6) биргелешкен илимий-техникалык программаны аткарган. 1993-жылы Европа биримдигинин базасында Европа союзу уюшулган.