КАЙЫШ

КАЙЫШ – жүнү жыдытылып, ашатылып ийлен­ген тери. Бодонун, кайберендин терисин челдеп, жүнүн алып, малмага салып, тез-тез которушту­рат. Ашаткыга кирген соң (5–7 күндөн кийин), терини таза жууп, тоборсутуп, аз нымы менен тал­кууга салып, ийи жеткенче ийлейт. Жашоо-­тиричиликке байланыштуу көчмөнчүлүк тур­мушта ат жабдыктарын жасоо үчүн кайыш көп кол­донулган. Кайыштан жүгөн, куюшкан, басмайыл, нокто, көмөлдүрүк, үзөңгү боо, чылбыр, тизгин, канжыга, куткун, чаполоң, бүлдүргө, ошондой эле кур, кын жана башка буюмдар жасалган. Учурда кайыш жана ан­дан жасалган буюмдар атайын ишканаларда даярдалат.