ГИМНАСТИКА

ГИМНА́СТИКА (гр. gymnastikе – көнүктүрөм, машыктырам) – ден соолукту чыӊдоо, адамдын кыймыл жөндөмдүүлүгүн өрчүтүү үчүн методикалык ыкмалар м-н атайын тандалып алынган физикалык көнүгүүлөр системасы. Гимнастика м-н машыгуу адамдын дене-боюн ар тараптан өрчүтүп, кыймылдын ийкемдүүлүгүн жакшыртат, шамдагай ж-а чыдамкай болууга тарбиялайт. Гимнастикалык көнү-

гүүлөр бүтүндөй организмге, ошондой эле айрым булчуӊдар ж-а органдарга, булчуӊ топторуна таасир этет. Гимнастикалык көнүгүүлөр адамдын жынысына, жашына ж-а физикалык даярдыгына жараша сунуш кылынат. Гимнастикалык көнүгүүлөр б. з. ч. 3 миӊ жыл мурда эле белгилүү болуп, байыркы Кытайда ж-а Индияда дарылоо максатында, байыркы Римде ж-а орто кылымда кээ бир Батыш Европа өлкөлөрүндө аскердик дене тарбия системасында колдонулган. Азыркы учурда гимнастика ден соолукту чыӊдоо, спорттук ж-а колдонмо, эркин, көркөм гимнастика, акробатикалык (к. Акробатика) болуп бөлүнөт. Ден соолукту чыӊдоо багыты – денени тарбиялоого арналган. Колдонмо гимнастика – өндүрүштүк, кесиптик, аскердик, спорттук ж-а дарылоо багытында жүргүзүлөт. Гимнастика боюнча Кыргызстандын туӊгуч cпорт чеберлери: Г. Чокоева, Н. Корнецких, Р. Акрамов ж. б. Кыргызстанда гимнастиканын өнүгүшүнө Г. Штрассер, В. Финогенов, Г. Мухамедвалиевдер чоӊ салым кошушкан. КМДАда гимнастика б-ча сабак өтүлүп, атайын кафедрада илимий-методикалык иштер жүргүзүлөт, машыктыргычтар даярдалат. Гимнастика б-ча балдардын адистештирилген спорттук бөлүмдөрү, мектептер бар.
М. К. Саралаев.