ВЛАСОВ Владимир Александрович

ВЛА́СОВ Владимир Александрович [25. 12. 1902 (7. 1. 1903), Москва – 7. 9. 1986, ошол эле жер] – композитор, кыргыз профессионал музыкасын баштоочулардын бири, Кыргыз ССР эл артисти (1946), РСФСРдин искусствого эмгек сиңирген ишмери (1947), Кыргыз ССР Токтогул атындагы мамлекеттик сыйлыктын лауреаты (1970). П. Чайковский атындагы

мамлекеттик консерваториянын скрипка классын бүтүргөн (1928). Москванын музыкалык окуу жайларында музыка теориясы жана скрипкада ой­ноо боюнча сабак берген. 1926–1936-жылдары МХАТта дирижёр. 1936-жылы Кыргызстанга келген. 1936–1942-жылдары Кыргыз мамлекеттик музыка драма театрынын көркөм жетекчи­си, 1943–1949-жылдары Москва мамлекеттик филармониясы­нын директору жана көркөм жетекчиси болуп иштеген. 1932-жылдан СССР композитордор сою­зунун мүчөсү. Композитор А. Малдыбаев, В. Фере менен бирге «Манас», «Токтогул», «Көл боюнда», «Пат­риоттор», «Эл уулу», В. Фере менен «Михаил Фрунзе», «Айчүрөк» операларын, «Алтын кыз», «Ажал ордуна» (А. Малдыбаев, В. Фере менен) музыкалык драмаларын, «Анар», «Селкинчек» (экөө тең В. Фере менен), «Шурале», «Ала Тоодогу жаз», «Асел» жана башка балеттерин жазган. «Токтогул» симфониялык поэмасын (1958), «Румын рапсодиясын» (1955), «Майрамдык увертюраны» (1957), «Акын Ленинди ырдайт» (1957) кантатасын, «Үч бул­бул кайдасыңар» (А. Малдыбаев менен бирге), «Бакыт», «Бир тууган айылда» деген оратория­ларды, «Бакыт жөнүндө баян», «Колхоздогу той», «Кош, Гүлсары», «Менин Кыргызстаным» аттуу ода-кантаталарды (А. Малдыбаев, В. Фере менен), көптөгөн камералык-аспаптык чыгарма­ларды, ырларды, романстарды, хорлорду жаз­ган. Ал кыргыз элинин профессионалдык му­зыкасынын түптөлүшүнө, калыптанышына, өсүшүнө өзгөчө салым кошкон. Власов эки Эмгек Кызыл Туу, «Ардак Белгиси» ордендери жана медалдар менен сыйланган.

Ад.: Виноградов В. С. В. Власов, А. Малдыбаев, В. Фере. М., 1958.