БЕЛЕК (сыйлык, тартуу)

БЕЛЕК – сыйлык, тартуу. Байыртадан уз, уста­лардын асемделип, колго жасалган нускалуу буюмдары (кийим-кечек, буюм-тайым, сынпос ээр ­токум, камчы, кемер, чачпак, желбирөөч жана башкалар, мал (күлүк ат, жорго) же көпчүлүктүн көз кы­рында турган баалуу нерселер калк кадырманда­рына Белек катары тартууланып келген. Аны алган адам ыраазычылыгын билдирип, Белек тартуула­ган адамга байлыгын, бардардыгын, жоомартты­гын, жол билгилигин көрсөтүп, ат, тай, тайлак, торпок, кой, чоң байлар короосуна кой салып, өрүшүнө мал айдап беришкен. Тойдо таякелерине мейманчылап келген жээндерди өзүнчө бөлүп, аларга атайын жээн табак уюштурушуп, Белек ка­тары акча-тыйын, кийим-кече, мал жана башкаларды берген. Мындай салт адамдарды жакындатып, бири-би­ринин сырын билүүгө, ич ара жок нерсесине жар­дам берүүгө көмөк көрсөткөн, салтанаттуу чогу­луштарда эмгек алдыңкыларына, жарышта, мел­деште жеңип чыккандарга сыйлык катары баа­луу Белектер тапшырылган. Учурда майрамдарда, тойлордо, туулган күндө, базарлап келгенде ар кандай Белек берүү салтка айланып калды.