ЖҮРҮШ

ЖҮРҮШ , а с к е р д и к (фр. marche – жүрүү, алдыга жүрүү) – 1) күжүрмөн тапшырманы ат­каруу үчүн белгилүү бир убакытта мерчемдүү аймакка келүү максатында аскерлердин уюш­кандыкта транспорт каражаттары м-н же жөө жүрүүсү. Жүрүш эреже катары түнүндө, жашыруун, ал эми күжүрмөн иш-аракет убагында ж-а ас­кердик ооруктарында күндүзү болот. Жүрүштүн не­гизги көрсөткүчтөрү: алыстыгы (баштапкы чектен мерчемдүү чекке чейинки жолдун узундугу км м-н); узактыгы (саат же сутка м-н – баштапкы чекти өтүү убактысынан мерчемдүү аймакта то­лук топтолгонго чейин); бөлүнгөн багыттардын саны же кыймыл тилкесинин кеңдиги; сутка­лык өтүүлөрдүн саны – жүрүш убагында бир сутка­да аскерлер басып өткөн аралык; суткалык өтүүлөрдүн алыстыгы (км м-н); колонна кый­мылынын орточо ылдамдыгы (жүрүү ылдамды­гы); сутка (саат) ичинде кыймылдын убакты­сы; 2) согуштук тапшырманы аткаруу үчүн ас­керлердин же согуш кемелеринин жолго чыгы­шы. Армиянын (флоттун) душмандын аймагы­на басып кирүүсүн, алыскы аралыкка аскерлер­дин (кемелердин) орун которуусун, согушууну ж-а салгылашууну камтыган күч-аракеттер; 3) уюмдашкан түрдө чыгуу.