БРЮССЕЛЬ

БРЮ́ССЕ́ЛЬ (фр. Bruxelles, фламанча Brussel) – Бельгия Королдугунун борбор шаары. Сенна дарыясынын боюнда жайгашкан. Брабант провинциясынын административдик борбору. Калкы 1,2 млн (2006; 2,1 млн, шаар айланасы менен). Ири жолдор, порт, каналдар тоому. Завентем эл аралык аэропорту бар. Улуттук жана чет өлкөлүк көп банктардын башкармалары; түрдүү машина куруу (анын ичинде автомобиль жана прибор куруу), электр-техника, химия, тамак-аш, фармацевтика, парфюмерия, полиграфия, булгаары, жеӊил өнөр жайы бар. Кустардык жол менен тор, килем токуу байыртадан

Шаардагы ири гильдия (корпорация).

эле колдонулуп келген. Зергерчилик өнүккөн. Метрополитен, университет (1834-жылдан), Географиялык институт, Искусство жана ИА, Пастер институту иштейт. Эски жана заманбап искусство, Королдук көркөм өнөр жана тарых музейлери ж. б. бар; Брюсселде эл аралык конференциялар, съезддер өткөрүлүп турат.
Брюссель – 12-кылымдын 2-жарымынан Брабант герцогдугунун башкы экономикалык борборунун бири. Мында Брабант герцогдорунун (кийинчерээк Нидерланддагы Габсбургдардын наместнигинин) резиденциясы болгон. Нидерланд революциясынын жүрүшүндө 1576-жылы 4-сентябрда Брюсселде чыккан көтөрүлүш өлкөнүн түштүгүндө испандык үстөмдүктү жок кылган, бирок 1585-жылы испан аскерлери шаарды кайрадан басып алган. 1830-жылы Бельгия мамлекети түзүлгөндөн кийин, Брюссель анын борбору болгон. 1914–18-, 1940–44-жылдарда герман аскерлери басып алган. Брюсселде НАТОнун штаб-квартирасы, Европа Экономикалык Союзунун, Бенилюкстун борбордук органдары жайгашкан. 1958-жылы Бүткүл дүйнөлүк көргөзмө өткөн. 11–19-кылымдардагы көптөгөн архитектуралык эстеликтер, готика стилиндеги ратуша (15-кылым) жана собор (13–15-кылымдар) сакталган. Шаардын тарыхый борбору, 90 метрлик коӊгуроолуу готика стилиндеги ратуша Бүткүл дүйнөлүк мурастын тизмесине кирген.
Ад.: Большая Российская энциклопедия. Т. 4. М., 2006.