ДИПЛОМАТИЯЛЫК ӨКҮЛЧҮЛҮК

ДИПЛОМАТИЯЛЫК ӨКҮЛЧҮЛҮК – мамлекет­тин чет өлкөлөр м-н катнашуу мекемеси. Ту­руктуу расмий байланыш жүргүзүү үчүн мамле­кеттердин өз ара макулдашуусунун чегинде Дипломатиялык өкүлчүлүк түзүлөт ж-а ал өкүлчүлүк мамлекеттердин орто­сунда дипломатиялык мамилелер түзүлгөндөн кийин жи­берилет. Дипломатиялык өкүлчүлүк экономикалык, маданий байланыш, сая­сий маселелер, басма сөз, аскердик атташе, кон­сулдук иштер сыяктуу бөлүмдөрдөн турат. Анын курамы: а) дипломатиялык (элчи, атташе, катчылар ж-а кеңешчилер); б) административдик, в) техникалык кызматкерлер болуп бөлүнөт. Дипломатиялык өкүлчүлүктүн башкы милдети: өз өлкөсүнүн ж-а анын жарандарынын кызыкчы­лыгын эл аралык укуктун чегинде коргоо; өзү иштеп турган өлкөнүн өкмөтү м-н сүйлөшүүлөр­дү жүргүзүү; ал өлкөнүн саясий турмушу ж-а ан­да болуп жаткан окуялар тууралуу мыйзамдуу жол м-н өз өкмөтүн кабардар кылып туруу; өз өлкөсүнүн тышкы соодасынын жөнгө салыны­шы боюнча кам көрүү ж-а анын кызыкчылыгын коргоо. Дипломатиялык өкүлчүлүктүн негизги иш-вазийпасына кон­сулдук ишти да кошууга болот. Дипломатиялык өкүлчүлүктү аны ак­кредиттеген өлкө кайра чакыртып алганда, өлкөлөр ортосунда дипломатиялык байланыш үзүлсө, же алардын ортосунда согуш башталганда ал өз ишин токтотот. Мындай учурларда Дипломатиялык өкүлчүлүк жай­гашкан имарат, архивдик ж. б. материалдар сак­талууга ж-а корголууга тийиш. Аккредиттеген мамлекет өзүнүн Дипломатиялык өкүлчүлүгүн, анын мүлкүн, дипломатиялык архивин кайсы бир үчүнчү мамлекеттин өкүлчү­лүгүнө ишенип берет.