ДҮЛӨЙЛҮК

ДҮЛӨЙЛҮК – кулактын укпай калышы же өтө начар угушу. Мында катуу үндү (ышкырык ж. б.) же кулактын түбүнө кыйкырып сүйлөгөн таа­ныш сөздөрдү гана жакшы угат. Дүлөйлүктө эки кула­гы тең же бир жагы укпай калат. Бир кулагы укпагандар көбүрөөк кездешет. Эки кулагы тең укпагандар атайын сурдологиялык жардамга муктаж болушат. Анын тубаса ж-а кийин пайда болгон түрү бар. Тубаса түрү тукум куума болушу ык­тымал, кош бойлуулардын ар түрдүү жугуштуу оорулар м-н оорушу же алкоголь ичимдикте­рин ичкенде, баланын кызылча, грипп, паротит м-н оорушу, ошондой эле резус-фактор шайкеш келбе­гендиктен да келип чыгышы мүмкүн. Кийин пайда болгон Дүлөйлүккө кээ бир жугуштуу ж. б. оору­лар же кулактын кырсыкка чалдыгышы алып келет. Ошондой эле кесип зыяндуулугу (ызы-чуу, ди­рилдөө), металл буулары (мисалы, коргошун, сы­мап, мышьяк) м-н уулануу да себеп болот. Бала сүйлөй баштаганда (3 жашка чейинки) ку­лагынын укпай калышы дудук-дүлөйлүккө алып келиши мүмкүн. Дүлөйлүк капысынан же бара-бара пайда болушу ыктымал. Капысынан болгон Дүлөйлүккө мээге кан куюлуу же ички кулакты кан м-н жабдуучу кан тамырлардын бүтөлүп калы­шы, артерия басымынын кескин өзгөрүшү, баш­тын кырсыкка чалдыгышы, өтө уулануу себеп болот. Дүлөйлүк отосклероздо, мээ кан тамырынын ате­росклерозунда ж-а кесип зыяндуулугунун натый­жасында бара-бара пайда болот. Анын эң ал­гачкы белгиси – кулак чуулдоо. Угуунун төмөн­дөшү өтө жай жүргөндүктөн, укпай калганда гана сезилет. Ошондуктан Дүлөйлүктү пайда кылуучу ооруну өз убагында дарылоо зарыл. Алдын алуу­да балдардын угуусун текшерип туруунун маа­ниси чоң. Дарылоодо ар кандай хирургиялык опера­ция колдонулат.

Ж. С. Сулайманов.