ВЕТЕРИНАРИЯ КЫЗМАТЫ

ВЕТЕРИНА́РИЯ КЫЗМАТЫ – ветеринария тар­магына тиешелүү болгон практикалык иш уюш­туруу ж-а жүргүзүү үчүн түзүлгөн ветеринариялык чаралар. Ветеринария кызматынын негизги милдеттери: өлкөдөгү жаны­барлардын арасында жугуштуу оорулардын пай­да болушуна ж-а таркалышына бөгөт коюу, мал­дын ылаңдарын алдын алуу, дарылоо ж-а элди санитардык, экологиялык жактан, жугуштуу агенттерден таза мал чарба ж-а өсүмдүк азык-түлүктөрү м-н камсыз кылуу. Кыргызстанда алгачкы Ветеринария кызматы 1924-жылы түзүлгөн ж-а анын жетекчиси ветврач-револю­ционер С. М. Воскресенский болгон. Андан соң Ветеринария кызматынын тармагы кенейтиле баштаган ж-а жаңы ветеринариялык дарылоо, алдын алуу пункттары ар бир аймакта ачылган. Ветеринариялык кызмат көрсөтүү илимий негизде жүргүзүлө баштаган. 1940-жылдары Кыргызстанда атайын илимий мекеме – Кыргыз илим-изилдөө ветеринариялык тажрыйба станциясы уюштурулган. Ветеринария кызматынын түзүлүшү, анын милдеттери ж-а иш жүр­гүзүү принциптери атайын кабыл алынган «Ве­теринария жөнүндөгү закондо» каралган. Азыр­кы мезгилде Кыргыз Республикасында Ветеринария кызматы мамлекеттик, ведомстволук, жекече болуп бөлүнөт. Ал Айыл, суу чарба ж-а кайра иштетүү министрлигинин алдындагы Мамлекеттик ветеринариялык департаментке баш иет. Ветеринария кызматынын тармагын облустук, шаардык, райондук, айылдык ветеринариялык бөлүмдөр (мекемелер), ветеринариялык лабор­аториялар, ветеринариялык-санитардык ж-а ветеринариялык чек аралык карантин­дик пунктар түзөт. Б. К. Акназаров.