БЕКТУРСУНОВ

БЕКТУРСУНОВ Сүйүнтбек [20. 12. 1909, Олуя-Ата уезди, Кара-Суу болуштугу (азыркы Талас району, Үч-Кошой кыштагы) – 13. 6. 1962, Фрунзе] – котормочу, көркөм котормо чеберлеринин бири. Фрунзедеги педтехникумду бүтүргөн (1930), Кыр­гыз драма театрынын директору, «Ленинчил жаш» гезитинин редакторунун орун басары бо­луп иштеген. Котормочулук иши 1931-жылдан башталган. А. Чеховдун «Аңгемелер» (1940), В. В. Бартольддун «Кыргыздар» (1943), Л. Тол­стойдун «Согуш жана тынчтык» (1-т. 1949; 2-т. 1951; 3-т. 1954), «Аңгемелер жана жомоктор» (1953), «Жекшемби» (1956), «Тандалган чыгар­малар» (1959) ж. б., М. Горькийдин пьеса, аңге­мелерин, А. С. Пушкиндин «Капитан кызы» (1958), Майн Риддин «Башы жок чабандес» (1959), ошондой эле Л. Жариков, В. Маяковский, С. Улуг­заде, С. Аксаков, Э. Распэ, П. Абрахамс, И. Со­колов-Микитов, Н. Островский ж. б. акын-жа­зуучулардын чыгармаларын которгон. Л. Тол­стойдун «Согуш жана тынчтык» эпопеясын ко­торушу анын улуттук адабиятка кошкон зор салы­мы болгон. Ал В. Горячих м-н бирдикте «Ар­мансыз азаматтар» деген пьеса да жазган. «Кыр­гызфильм» студиясында көптөгөн кинону кыр­гызчалаткан.