БЕШ-ТАШ

БЕШТАШ – Талас р-нундагы суу, Талас д-нын сол куймасы. Уз. 54 км, алабынын аянты 314 км². Талас Алатоосунун борб. бөлүгүндөгү Бешташ ашуусундагы мөңгүдөн башталып, кууш Бешташ капчыгайы аркылуу түн.-батышты карай агат. Талас өрөөнүнө чыкканда түндүккө бурулат. Жылдык орт. чыгымы 3,55 м³/сек; байкалган эң көп чыгымы – 55,4 м³/сек, эң азы – 0,37 м³/сек. Июнь айында кирип, августта тартылат. Жал­пы уз. 192 кмге жеткен 88 куймасы бар. Эң ири­лери: Кайыңды, Өмүр, Карагайлы, Терек, Туюк­төр, Коргоншанык (сол), Корумду, Кыркколот, Төбөй, Атчыкпас (оң). Алабында жалпы аянты 0,79 км² келген 7 тоо көлү бар; эң ириси – Беш­таш көлү. Сугатка пайдаланылат. Боюнда Ко­зучак, Балбал, Хивинка кыш. жайгашкан.