ДЕНЕ САПАТТАРЫ

ДЕНЕ САПАТТАРЫ – адам денесинин спорттук кыймыл-аракеттерге болгон мүмкүнчүлүктөрү. Бардык эле адамдын ондогон км аралыкка жү­гүрүүгө же бир нече кмге сүзүүгө мүмкүнчүлүгү болбойт. Мындай көнүгүүлөрдү денеси машык­кан ж-а Д. с. (күчү, чыдамкайлыгы, ийилчээк­тиги, ылдамдыгы, шамдагайлыгы) өнүккөн спортчу гана аткара алат. Д. с. өнүккөн адам ар кандай көнүгүүлөрдү жеӊил, так ж-а туура ат­карат. Д. с. адамдын жашына жараша ар кан­дай өнүгөт. Спортто күчтү өнүктүрүүнүн маани­си өтө чоӊ. Спорттун дээрлик көпчүлүк бөлүгүндө (мис., күрөштө, бокста, оордук көтөрүүдө ж. б.) күчтүн көрсөткүчү эӊ маанилүү ролду ойнойт. Ылдамдыктын мааниси да спортто зор. Себеби, кайсы гана спортто болбосун (күрөштө, бокста, футболдо) ылдамдыгы жакшы өнүккөн спорт­чу гана жеӊишке жете алат. Чыдамкайлык – адам кыймыл-аракеттерди көп убакытка чейин аткара алгандыгы. Чыдамкайлыкты өнүктүрүү үчүн жүгүрүү, сууда сүзүү, лыжа тебүү сыяктуу көнүгүүлөрдү аткаруу зарыл. Шамдагайлык ж-а ийкемдүүлүк сапаттар спорт оюндарынын дээрлик көпчүлүк бөлүгүндө, айрыкча гимнас­тика оюндарында чоӊ мааниге ээ.