ДИДАКТИКАЛЫК ПРИНЦИПТЕР

ДИДАКТИКАЛЫК ПРИНЦИПТЕР – тарбиялоо­нун жалпы максаттарына жана окутуу процес­синин мыйзам ченемдүүлүктөрүнө ылайык мек­тептин окуу ишинин мазмунун, уюштуруу фор­маларын жана ыкмаларын аныктоочу алгачкы жоболор. Демек, окутуу принциптери бул са­бакты (окутуу процессин) даярдап өткөрүүгө ко­юлуучу талаптарды туюнта турган алгачкы ди­дактикалык жоболор болуп саналат. Дидакти­када окутуунун төмөнкү принциптери иштелип чыккан: билим берүү, тарбиялоо жана өнүктүрүп­-өстүрүү маселелерин комплекстүү ишке ашыруу. Окутуу менен тарбиялоонун биримдүүлүк мыйза­мына ылайык окутууда тарбия дайыма камты­лат, башкача айтканда окутуу процессинде окуучулар билим алуу менен бирге керектүү сапаттарга да тарбия­ланышат. Окуу процессинде окуучунун турмуш­ка жана билимге болгон мамилеси, ар нерсеге жөндөмдүүлүгү, адеп-ахлактык сезими калып­танат, акылы өсөт, башкача айтканда окутуу менен бирге тар­бия да болот. Тарбиялык таасир окутуунун ажырагыс жандоочусу болуп эсептелет. Мын­дай окутуу окуучуларга дайыма бирдей тарбия­лык таасир берет, анда мугалимдин атайын жасаган аракеттери маанилүү. Анын идеялык багыты ж-а окуучуларга тийгизе турган тааси­ринин күчү төрт фактор (окутулуучу билимдер­дин мазмуну, окутуу ыкмалары, сабакты уюш­туруу формалары ж-а мугалимдин инсан ката­ры таасири) менен аныкталат. Окутуунун натый­жасында окуучулар билим алышат, билгичтик­ке үйрөнүшөт, аларда илимий көз караштын негиз­дери калыптанат жана алардын таанып-билүү жөндөмү өсөт. Мунун бардыгы окуучуларда коомдук жүрүш-туруштун нормаларынын жана адеп-ахлактык идеялардын калыптанышынын негизин түзөт. Демек, окуу процессинин өзүндө окуучуну коомдук социалдык нормаларга тар­биялоо да ишке ашырылат.