ДҮР

ДҮР Сооронбай уулу (туулган жылы белгисиз –1918) – Токмок уездиндеги болуш, тынай эли­нен чыккан алгачкы агартуучулардын бири. Сооронбай манаптын үчүнчү уулу. Верныйдагы

аскердик гимназияда М. В. Фрунзе м-н бирге окуп, аны күмүш медаль м-н бүтүрүп, кийин атасынын ордуна Токмок уездинде болуш бол­гон. Эл таламын жүзөгө ашыруу үчүн Сайлык кыш­тагына жаңы типтеги мектеп ачтырып, кыргыз балдарын окууга тарткан. Анда дин сабактарынан тышкары, арифметика, тарых, геогра­фия, орус тил сабактары окутулуп, 1889–90-окуу жылында 60 окуучу кабыл алынган. Бул мек­тептин түбүнө таш, бышкан кыш төшөлүп, жыгач м-н курулуп, үстү тунукеленген имара­ты, кезегинде ошол жердеги кооз жайлардын бирине айланган. Дүр мектебинде балдар үчүн интернат да болгон. Кийинчерээк, ал орус ти­линде билим берген мектеп катары аты чык­кан. 1916-жылдагы көтөрүлүштө (к. Үркүн) өзүнө караган 400 түтүн элди Кытайга качырбай, жазалоодон куткарып калган. 1918-жылы ак гвар­диячы орустар тарабынан атылган. Ысмы Чүй районунун Сайлык кыштагындагы орто мектепке ыйгарылган.