ДИЕТОЛОГИЯ

ДИЕТОЛО́ГИЯ (диета ж-а ...логия), д и е т е­ т и к а – оорулуу адамды мүнөздөп тамактан­дыруу жөнүндөгү илим. Ал түрдүү ооруларга ыла­йык тамактануу принциптерин изилдейт. Мур­да ден соолукту сактоо жөнүндөгү бардык илим (азыркы гигиена) диететика деп аталган. Диетология теориялык жактан мүнөздөп тамактандырууга негизделген. Оорулуунун тамактанышына адам коомунун бардык мезгилинде көңүл бурулган. Байыркы грек дарыгери Гиппократ оорунун түрдүү баскы­чында тамакты сан ж-а сапат жагынан туура пайдаланууну сунуш кылган. Рим дарыгери Асклепиад (б. з. ч. 128—56 кк) фармакологиялык дарылоо­ну жактырбай, шакирттери м-н бирдикте түрдүү ооруларды дарылоодо мүнөздүү тамак-ашты кол­донуу көрсөтмөлөрүн иштеп чыккан. Оорулуу адамдын тамактанышына рим дарыгери Гален көп көңүл бурган. 18-кылымдын аягы, өзгөчө 19-к­ылымдын 2-жарымында диетология өркүндөйт. Витаминдердин ачылышы, оорулуунун тамагындагы минерал­дык заттар жөнүндө маселелердин чечилиши диетологиянын илим катары өнүгүшүнө шарт түзгөн. Буга орус илимпоздору: И. М. Сеченов, А. А. Остроумов, А. И. Яроцкий, И. П. Павлов ж-а советтик илим­поздор: С. М. Рысс, М. М. Губергриц, Л. А. Чер­кес, Д. Б. Маршалкович, О. П. Молчанова ж. б. чоң салым кошкон. Дарылоодо диетологиянын жетиш­кендиктерин так ж-а туура колдонуу үчүн са­наторийлерде, дарылоо мекемелеринде диетолог врач, диета сестралары бар.

Ад.: Лечебное питание / Под ред. И. С. Савощенко. М., 1971.