ЖАРЫК ИНТЕРФЕРЕНЦИЯСЫ

ЖАРЫК ИНТЕРФЕРЕНЦИЯСЫ – эки же бир нече жарык толкундары кабатталганда, жарык энергиясынын мейкиндикте кайра бөлүштү­рүлүшү, б. а. алардын ургаалдуулугунун (интен­сивдүүлүгүнүн) күчөшү ж-а басаңдашы. Ж. и. эк­ранда же башка бетте жарык же караңгы тил­келер түрүндө байкалат. Когеренттүү толкундар гана Ж. и-н берет. Ж. и-н алгач И. Ньютон бай­каган, бирок ал өзүнүн корпускулалык теория­сы м-н бул кубулушту түшүндүрө алган эмес. 19-к-дын башында англ. окумуштуу Т. Юнг ж-а фр. физик О. Френель Ж. и-н толкун кубу­лушу иретинде түшүндүргөн. Ж. и. нурлардын толкун узундугун өлчөөдө, заттардын спектр сы­зыгын, тыгыздыгын, сынуу көрсөткүчүн, опти­калык нерселердин сапатын ж. б-ды аныктоодо колдонулат. Интерференция кубулушунун не­гизинде оптиканын жаңы тармагы голография өнүгүүдө.