ЖҮРӨК АСТМАСЫ

ЖҮРӨК АСТМАСЫ – жүрөктүн иштеши начар­лагандыктан, кан өпкөдө көпкө кармалып, газ алмашуу бузулуп, канда көмүр кычкыл газдын көбөйүшү дем алуу борборун дүүлүктүрүп, дем кыстыктыруучу оору. Жүрөк астмамсы миокарддын инфарк­ты, жүрөктүн ишемия оорусу, жүрөктүн толто кемтиги, гипертония оорусу ж. б-дан болушу мүмкүн. Жүрөк астмасы канды сол карынчадан толтого түртүү начарлаганда болот деп божомолдонот. Физикалык ж-а психикалык күч келүүдөн приступ кар­машы мүмкүн. Ал көбүнчө түнкүсүн кармайт: оорулуу капыстан деми кыстыгуудан ойгонот, башын көтөрүп турууга мажбур бо­лот. Деми кыстыкканы улам кү­чөп, жөтөлөт, көбүктүү какырык чыгат. Алы кетип, чабалактап, муз­дак тер басып, териси кара көк тар­тат. Оор учуру өпкө күпчөгүн пайда кылат. Жүрөк астмасы оорулуунун өмүрүнө коркунучтуу болгондуктан, тез да­рылоо талапка ылайык. Оорулууну бутун салаңдатып отургузуп, тере­зени ачып, таза аба м-н дем алды­руу зарыл, мүмкүн болсо кычкыл­тек жаздыкчасы аркылуу дем алды­рып, дароо тез жардам чакыруу керек. Дарылоо өз убагында баш­талса, натыйжалуу болот. Жүрөк астмасынын алдын алуу үчүн жүрөк ишин на­чарлатуучу ооруларды өз убагында ж-а системалуу түрдө дарылоо за­рыл.