«ВЕНЕРА» –

«ВЕН́ЕРА» – Чолпон (Венера) планетасын ж-а космос мейкиндигин изилдөөгө арналган планета аралык автоматтык станциялардын (ПААС) жалпы аты; алардын иштеп чыгуу ж-а учуруу программасы. «Венера-1» ПААС 1961-ж. 12-февралда учурулган. Массасы 643,5 кг. 1961-жылдын 19–20-майында Чолпондон 100 миӊ км аралыкта учуп өтүп, Күндүн жандоочусунун орбитасына өткөн. «Венера-2» 1965-ж. 12-ноябрда, ал эми «Венера-3» 1965-ж. 16-ноябрда учурулуп, 1-мартта СССРдин Мамл. Гербинин сүрөтү бар вымпелди Чолпонго жеткирген. Кийинки учурулган «Венера-4», «Венера-5», «Венера-6» ПААСтары Чолпондун атм-сынын параметрлерин ченеп, Жерге маанилүү маалыматтарды берген. «Венера-7» 1970-ж. 15-декабрда, ал эми «Венера-8» 1972-ж. 22-июлда Чолпонго акырын конууну ишке ашырышкан. 1975-жылдын 8- ж-а 14-июнунда учурулган «Венера-9» ж-а «Венера- 10» ПААСтары ошол жылдын 22-октябрында Чолпон планетасына жетишкен. Бул эки ПААСтын түшүрүлүүчү аппараттары Чолпон планетасына жетерден эки сутка мурда станциялардан бөлүнүп, бири-биринен 2200 км аралыкка кондурулган. «Венера-9» ж-а «Венера-10» автоматтык станциялары тарыхта биринчи болуп Чолпон планетасынын жасалма жандоочулары болуп калышты. 1961–83-ж. «В-нын» 16 ПААСЫ учурулган. Аппараттарга орнотулган ил. приборлордун жардамы м-н Чолпон планетасынын атм-сынын физ.-хим. параметрлери, оптикалык мүнөздөмөлөрү өлчөндү ж-а булут катмарларынын структурасы, планета бетинин жарыктанышы, ал аппараттар конгон жердин топурагынын физ. касиеттери изилденди.