ГАРСИЯ МАРКЕС

ГАРСИ́Я МА́РКЕС Габриель (6.3.1928–17.4.2014, Мехико, Мексика, Колумбия, Аракатака) – колумбиялык жазуучу, публицист, саясий ж-а коомдук ишмер. Нобель сыйлыгынын лауреаты (1982). Боготада ж-а Европада «Эль Эспектадор» деген либералдык гезитте репортёр, 1959–60-жылдары кубалык «Пренс Латин» агентчилигинде кабарчы болуп иштеген. Ал «Жерге түшкөн жалбырактар» (1955), «Полковникке эч ким кат жазбайт» (1958) деген повесттердин, «Жагымсыз заман» (1962), «Жалгыздыктын жүз жылы» (1967), «Патриархтын күзү» (1975), «Жарыяланган өлүмдүн хроникасы» (1981), «Чума мезгилиндеги майрам» (1985) аттуу романдардын, «Улуу Эненин көргө коюлушу» аӊгемелер жыйнагынын автору. «Жалгыздыктын жүз жылы» романы – Латын Америкасынын адабияты гана эмес, 20-кылымдын дүйнөлүк адабиятынын туу чокуларынын бири. Романда бир кылым бою цивилизациядан артта калып, сырткы дүйнө м-н байланышы үзүлгөн адамдардын деградацияга учурашын сүрөттөгөн. «Полковникке эч ким кат жазбайт» повестинде социалдык теӊсиздикти ашкерелеген.
Д. Буржубаева.