ВЕРГИЛИЙ

ВЕРГИ́ЛИЙ Марон Публий (б. з. ч. 15.10.70, Мантунга жакын – б. з. ч. 21.9.19, Брундизий, азыркы Бриндизи) – Рим акыны. Анын чыг-лыгына Лукрецийдин философиясы, Катуллдун лирикасы чоӊ таасир тийгизген. В. он бөлүмдөн турган алгачкы «Буколикалар» («Койчу ырлары», б. з. ч. 42–38) жыйнагында саясий толкундардан четтеп, малчылардын турмушун сүрөттөөгө аракеттенген. Ырдын 4-бөлүмүндө Рим империясын даӊазаласа да, анын жеке менчикке негизделген карама-каршылыгын көрсөтүп, ага «алтын заман» (кылым) ж-дөгү утопиялык оюн каршы койгон. В. «Георгика» («Дыйканчылык тууралуу поэма», б. з. ч. 36–29) дидактикалык поэмасында бейпил турмушту кыштак адамдарынын жашоосунан көргөн. «Энеида» баатырдык эпосу (антикалык эпостун римдик параллели) – рим классикалык поэзиясынын туу чокусу. «Илиада» м-н «Одиссеяны» үлгү тутуп, бул поэмасында император Августтун түп атасы Энейдин жоруктары м-н күрөштөрү тууралуу баяндаган. Байыркы Италиянын картинасын идеалдаштырып, аны Римдин орчундуу проблемалары м-н тыгыз байланыштырат. Анда эпикурдук ж-а идиллиялык мотивдер саясий проблемаларга болгон кызыгуу м-н айкалышып, Рим империясы даӊазаланган. В-дин чыгармалары классицизм доорундагы риторикалык, эпикалык поэзиянын үлгүсү болгон.