ГРИГОРЬЕВ (Ысык-Көл районундагы кыштак)

ГРИГО́РЬЕВ – Ысык-Көл р-нундагы кыштак. Садыр аке айыл округуна караштуу. Чоӊ Ак-Суу суусунун ж-а Бишкек – Каракол автомобиль жолунун боюнда, деӊиз деӊг. 1650 м бийиктикте жайгашкан. Райондун борб. Чолпон-Ата ш-нан 35 км чыгыш тарапта. Балыкчы темир жол бекетинен 115 км. Кыштак 1913-ж. негизделген. Калкы 4778 (2009); негизинен дыйканчылыкта эмгектенет. Орто мектеп, 2 бала бакча, оорукана, дарыкана, мад-т үйү, клуб, китепкана, универмаг, ашкана бар. Нан з-ду, үй-бүлөлүк врачтар тобу, турмуш-тиричилик комбинатынын бөлүмдөрү иштейт. Улуу Ата мекендик согушта курман болгондорго эстелик тургузулган.