ГҮЛДӨӨ

ГҮЛДӨӨ – кеӊ мааниде: өсүмдүктөгү айрым гүлдөрдүн ачылышынан эӊ акырында ачылган гүлдөрдүн солушуна чейинки мезгил; тар мааниде: богоктун (гүл бүчүрүнүн) ачылышынан гүл коргон (же таажыча) м-н аталыктардын солуп, кургашына чейинки мезгил. Бир жылдык өсүмдүк уруктан өсүп чыгып, ошол эле жылы, ал эми эки жылдык өсүмдүк экинчи, көп жылдык өсүмдүк экинчи – үчүнчү же андан кийинки жылдарда гүлдөй баштайт. Айрым өсүмдүктөр бир гана жолу гүлдөйт да, куурап калат (к. Монокарп өсүмдүктөр). Кээ бир тропик өсүмдүктөрү (какао, кофе, кокос пальмасы) дайыма гүлдөй берет. Алардын шагында бир эле мезгилде гүл да, мөмө да болот. Бир катар өсүмдүктөрдүн гүлдөрү гүлдөө бүткөнгө чейин ачылган бойдон, айрым өсүмдүктөрдүн гүлү ачылып-жабылып турат. Мисалы, тамеки, чырмоок гүлдөрү түнкүсүн ачылып, күндүз жабылып калат. Гүлдөөнүн узактыгы түрдүүчө: амазонка чөмүч башынын гүлдөөсү 20–30 мин созулса, тропик орхидейлери 70–80 күн гүлдөйт; пахтанын кээ бир гүлдөрү эртеӊ м-н ачылып, кечке жакын солуй баштайт; жүзүм 7–11, алма, алмурут 8–14 күн гүлдөйт. Чаӊдашуу жүргөндөн кийин гүл коргон, аталыктар, энеликтин чаӊча түтүкчөсүнүн чаӊ алгычы солуп, куурай баштайт.